「買餸初哥」韋志成 嘉咸檔主

【明報專訊】呢幾年唔少高官都鍾意寫blog，做過發展局常秘嘅市建局行政總監韋志成亦趕潮流，噚日就回顧市建局搞咗8年嘅「嘉咸市集」，佢話唔少人驚中區嘉咸街重建會搞到呢個百年露天市集消失，所以喺重建範圍起咗個「鮮貨零售中心」，延續「市集」嘅意義，亦打算日後部分地舖租畀重建項目內或者區內嘅老字號店舖，承傳傳統手藝。


「鮮貨零售中心」最近開咗，以往喺嘉咸街擺檔嘅十幾個攤檔已搬咗入去，自稱係「買餸初哥」嘅韋志成最近入過去，話要親自答謝啲攤檔。佢話喺零售中心開幕前同一啲檔主傾過，好似蘇蝦菜檔嘅銀姐同鮮魚檔郭太，佢哋仲分別推介韋志成買小捲心菜同挪威三文魚。


韋志成話由於零售中心附近仲有地盤，所以地盤用咗成本高啲嘅「低噪音打樁技術」，又幫受影響攤檔加建安全上蓋。佢話特別設計零售中心係兩面臨街，令攤檔可以繼續做「街舖」，延續市民「行街買嘢」嘅地區文化。