日前嘆「心寒」 田少愛駒爆冷贏頭馬

【明報專訊】自由黨田北俊雖然無貼中上周六嘅六合彩號碼，但噚日都有喜訊，佢同太太名下嘅愛駒「人民武士」，噚日喺第10場嘅1400米賽事贏到頭馬，為田少冲冲喜。


田少近日就黨友張宇人加入行政會議一事同對方隔空論戰，而唔知乜嘢緣故，田少前日喺facebook突然留言話「唔祇天氣寒，心更寒。大家保重」。不過，田少噚日就有開心嘢，佢同太太名下嘅澳洲4歲馬「人民武士」，出道首5戰曾有3冠1亞1殿佳績，曾被視為明日之星，但此駒自去年12月27日取勝後，再出跑9次都未有頭馬進帳，直至噚日狀態大勇，爆出11倍冷門勝出。


不過，Emily喺馬場就唔見田少一家，所以佢哋錯過咗拉頭馬呢一幕，但「人民武士」今次都為佢帶來492,765元獎金。