示威輕易被抬走 許智峯：要健身

【明報專訊】民主黨許智峯（圖）喺黨內7個議員中，被認為係走得較前嘅一個，身形唔算健碩嘅佢噚日搞傳媒茶敘，講笑話自己未來要健身，為日後示威場合做準備，舉例話民主黨喺之前國慶酒會示威被趕離場，對住身形高大嘅林卓廷同有咁上下分量嘅尹兆堅，保安都要花唔少氣力先搬得郁，但自己就被輕易咁抬走。


屬於建制派嘅獨立議員何君堯常被指言論惹火，但許智峯話，自己入立法會前已認識佢，都算傾到偈，佢有時會問何君堯點解說話咁「激進」，何君堯就會話自己「speak from my heart（說話從心）」。


拒新民黨邀請 Paul：唔關「嫁妝」事

另外，有報道話新民黨主席葉劉淑儀最近邀請獨立議員謝偉俊（Paul）入黨，為接班鋪路。葉太噚日以「無評論」3個字回應報道，阿Paul就不置可否，話自己一直有同各黨派聯繫，家傾向「自由自在」、唔受政黨掣肘，未到「談婚論嫁」階段，咁就可以多講、多做自己想嘅事。係咪條件唔啱所以唔入黨呢？阿Paul就話唔關「嫁妝」事。對於日後會唔會加入政黨，佢話立場開放，唔排除任何可能，因為單打獨鬥有時都辛苦，但家仲應付到。