廉署培訓課程 猛人雲集講學 曾鈺成大談抗日史

【明報專訊】廉署過去36年，每年都會舉辦為期1個月嘅總調查主任指揮課程，邀請內部人員同國內外伙伴組織參加，旨在提升佢哋嘅領導才能同管理技巧，今年嘅課程今日完結，Emily噚日同啲學員傾開偈，發現個課程有好多猛人講學，包括立法會前主席曾鈺成就大談抗日史。


曾鈺成嘅講題係Today's Young Radicals, Tomorrow's Visionaries，參與課程嘅新西蘭嚴重欺詐案調查局首席調查律師郭岱恩話，曾鈺成介紹咗香港嘅立法會情况，又講中國抗日時死傷無數，他大讚曾前主席講得好有個人風格之餘，亦好觸動人心，令佢印象深刻。可以由立法會講到去抗日歷史，Emily估計都係「梁游宣誓」嘅「支那」論啟發到前主席嘞！


除咗曾鈺成，仲有行會召集人林煥光講公僕對人民嘅承諾同面對嘅挑戰，廉署審查貪污舉報諮詢委員會主席譚惠珠講中港有效嘅領導風格，警務處高級助理處長李建輝就講警方多年來建立嘅廉潔誠信，仲有湯家驊講香港政治等。課程總監、廉署執行處首席調查主任莊家樂話，總調查主任都有需要了解社會各方面情况，廉署不時要做跨境蒐證，呢類課程可加強國際合作，今年有歷來最多嘅31人參加，大家仲去咗大連交流一星期。