辦主題論壇打頭陣 理大「一帶一路」賀80周年校慶

【明報專訊】理工大學80周年校慶在即，校方今日舉行揭幕儀式宣布校慶年開始，但估唔到打頭陣嘅賀壽活動，係上晝搞一帶一路主題嘅論壇，由教育局長吳克儉做主禮嘉賓！到咗夜晚啟動禮，節目終於可以輕鬆啲，就係本地歌手同來自一帶一路國家嘅學生，表演民族文藝歌舞。


究竟校慶同支持中國偉大國策有咩關係？校長唐偉章就話，一帶一路係熱門話題，等同學認識多啲，又話一帶一路唔止係經濟發展，要成功嘅話，更要有足夠同適合人才支持先得，所以就決定搞論壇，等學生知道可以點樣配合一帶一路計劃。


唐偉章又話，80周年校慶，大學上下都隆重其事，所以今次仲請校友為校慶作咗首叫SHAPE the Future（創立未來 ）嘅主題曲。而Emily就喺創作團隊中，發現作曲嘅係組合歌手C AllStar成員On仔陳建安，校長話原來On仔當年係理大護理學院畢業生，所以今次校方邀請佢一顯音樂才華，亦同理大同學仔一齊拍咗個MV，為校慶留個美好回憶。


當然，除咗一帶一路，理大未來一年都有好多活動，好似明年3月起都會有幾位諾貝爾得獎學者到訪出席講座，亦有高球比賽等項目。