出山戰補選？ 嫻姐：諗都未諗過

【明報專訊】工聯會榮譽會長陳婉嫻（圖）立法會交棒後，喺政壇靜咗一段時間，不過因為最近宣誓風波引發出補選熱議，有人傳出想搵重量級人馬嫻姐出山，代表建制派一戰九龍西，或可同泛民爭得一席。


現身立會 話傾埋上屆手尾

噚日Emily就喺立法會偶遇嫻姐，唔通真係如傳聞般，佢返立法會共商補選大計？不過嫻姐一聽，即刻答「諗都未諗過」，表現出零興趣。至於會唔會支持黨友鄧家彪同王國興再出選，佢都一樣話「無諗過」。佢噚日現身立法會，只係傾埋一直着緊嘅時裝設計中心議題，因為上屆未能完成。


其實70歲嘅嫻姐不知幾享受退休生活，佢話啱啱去完日本旅行返嚟，行足5日山，連今次選委會選舉，本身係政協嘅佢都無去競爭，話做夠啦，「睇吓戲仲好啲」。