梁君彥無被激嬲 阿仔讚EQ高

【明報專訊】今屆立法會一開波已風波不斷，令新上任嘅立法會主席梁君彥都好頭痕，佢個仔梁宏正（Clarence）話事件令自己都有壓力，平日處事要更加謹言慎行，以免影響老竇咁話。


身為菁英會榮譽主席嘅Clarence噚日出席傳媒午宴，佢話好理解阿爸工作，指佢單人匹馬，上任後同秘書處、建制派、泛民磨合期都未有，就遇到比過去幾屆都難處理嘅狀况，兩面受敵。不過阿仔大讚阿爸EQ夠高，即使喺立法會遇到再多棘手事情，返到屋企都唔會有負面情緒表現出嚟，唯一唔同就係瞓得早咗，因為要提早到立法會準備，亦打醒十二分精神主持。


至於全國政協委員盧文端囝囝盧金榮噚日都有現身，佢姐夫吳永嘉循廠商會代表入咗立法會，盧金榮就話對方做得好好。而今屆盧金榮自己循廠商會界別成為選委，被問到特首人選就好小心，只笑言「未有馬、未有賠率」，唔講支持邊個住。


由本港企業二代組成嘅香港菁英會，本月30日將舉行以社會創新為題嘅「2016菁英論壇」，唔少重量級嘉賓會出席，包括前財政司長梁錦松、香港黃金五十創辦人林奮強，仲有唔少各界人士，包括金像獎最佳導演陳德森、好單位召集人黃英琦、高登CEO林祖舜等。