有話說﹕Minecraft風潮走進課室

【明報專訊】前排有智障人士院舍爆出駭人聽聞嘅風化案風波，聽到Mama心都寒。不過，大家又唔使咁灰，其實香港社會亦有陽光一面，Mama知道有唔少特殊學校，都與時並進，好用心咁為智障及有特殊學習需要嘅學童，提供優質教育服務。


或者好多家長都知道，家時下最流行嘅線上遊戲，非Minecraft莫屬，因為易上手，而且玩法多元化、可塑性高，所以令唔少中小學生着迷。Mama最近認識到兩間特殊學校校長，原來佢哋都睇到呢股風潮，因此決定將Minecraft融合於課堂之中！


匡智屯門晨崗學校石偉強校長話，學校今個學年，將Minecraft應用喺中文、英文、數學，以及設計與科技等科目之中，因為大家都睇到，呢個唔單止係遊戲，亦係好好嘅學習工具。


石校長舉例，有一個初中有自閉症嘅學生，一直好唔鍾意上中文堂，但老師聽聞佢好鍾意玩Minecraft，於是就同佢講，如果佢好好完成課堂功課，咁就可以用Minecraft做延伸學習。


嘩！呢個同學聽到老師咁講，即刻醒神晒，乖乖上堂之餘，仲試過根據課文內容，用Minecraft創造咗好多唔同嘅場景，再利用電子書嘅App，將呢啲插圖放入去，加埋錄音，將一篇課文化成一個有畫面嘅故事，滿足感好大呀！石校長笑笑口話，自此以後，呢個同學由好唔鍾意上中文堂，變為非常期待上中文堂，改變好明顯。


線上遊戲變學習動機

道慈佛社楊日霖紀念學校陳強佳校長亦都話，學校借助Minecraft呢個媒介，幫助學生發展溝通能力、思維能力。陳校長話畀Mama知，特殊學校學生，有部分學習動機真係好薄弱，亦都好少表達。佢哋學校就有一個男同學好誇張，經常缺課，幾乎日日要出動社工、副校長打電話搵佢返學。不過，自從學校上學年度開始，將Minecraft結合課堂之後，呢個同學就成日追住老師問Minecraft嘅問題，而且每朝仲早過校長企喺學校門口，你都咪話唔神奇！


陳校長學校嘅視覺藝術科，就試過叫同學仔用Minecraft設計智能家居，每個學生都各有特色，有啲鍾意用玻璃界面，有啲就鍾意用石頭界面，而佢哋創意亦奇高，有同學竟然設計咗一幢唔用升降機、而係用水柱接載住客上落嘅大廈。哈！如果Mama住喺呢座大廈都唔錯，每日可以慳番唔少全家人洗頭、冲涼嘅水費。