撤對冲動議無投票 林健鋒﹕「破相」睇醫生

【明報專訊】唔知係咪物極必反，經過幾個星期議會癱瘓後，立法會今個禮拜罕有平靜順暢，噚日更早早喺中午12點已完成所有議程。連經民聯梁美芬提出嘅促請政府修改《消防安全（建築物）條例》動議，都順利喺分組點票下通過，加埋禮拜三已完成嘅取消強積金對冲、中史獨立成科，一連合共3個動議全部通過。梁美芬噚日都感嘆，少有如此順利，對自己動議通過感到開心。


前日取消強積金對冲動議中，因多個強烈反對取消對冲嘅商界代表都不在席，經民聯林健鋒就為無投反對票解畫，話佢同黨友石禮謙咁啱雙雙因事要去睇醫生。林健鋒話因為近日「破相」，嘴角擦傷，佢話唔知自己點整親，但強調經民聯唔係夾埋唔投票。


同樣無投票嘅自由黨鍾國斌就話，周三當日有公務在身，認同今次高票通過動議支持取消對冲，可能畀咗錯誤信息政府，以為佢哋未來提出嘅方案都會順利通過，咁對商界確有好大影響。不過佢話前日就算佢同經民聯議員都有投票，都改變唔到個投票結果，所以商界都無畀壓力佢哋咁話。