嘉咸市集開幕 推「日日餸禮」吸客

【明報專訊】中環嘉咸街露天市集有過百年歷史，但隨住嘉咸街重建，呢個市集亦有轉變。Emily發現市建局喺嘉咸街同結志街交界嘅「鮮貨零售中心」終於營業，名叫「嘉咸市集」，噚日舉行啟用禮，又展開為期3個禮拜嘅「日日餸禮」推廣活動，附近超過70個攤檔同商戶響應參與，由即日起至12月7號，市民可憑免費派發嘅現金券喺參與攤檔同商戶使用，仲有機會得到保溫袋、切菜板等禮品。


重建後嘅嘉咸市集有12個舖位，分別由11個商戶承租，Emily知道自從嘉咸街一帶開始重建，商戶臨時搬走後生意麻麻，家有海鮮檔搬入新市集後試吓減價，希望生意好啲喎。市建局早前亦講過，嘉咸市集係成個重建項目率先完成嘅設施，周圍仲係地盤，所以市集開幕初期會向商戶提供租金優惠，而商戶搬入市集後，商戶原本一帶需要重建嘅樓宇亦可開始重建。