「錢家有道」辦深港通講座

【明報專訊】深港通就快殺到，雖然話滬港通已經行咗兩年，但相信好多散戶都仍然好奇，深港通究竟有咩投資機會，又有咩風險要注意？投資者教育中心「錢家有道」除咗晚晚唱歌畀大家聽之外，嚟緊下周六（26日）仲會舉辦講座，到時一班投資者可以聽吓深港通有咩要注意啦！

雖然家深港通仲未知邊日會正式開通，不過「錢家有道」呢個深滬港股市互聯互通講座，就已經鐵定下周六喺北角海逸君綽酒店舉行，除咗有學者麥萃才、資深銀行家溫天納講吓投資機會，最重要係有港交所（0388）以及證監會代表，提醒一吓投資者有咩風險需要注意，有興趣嘅投資者，可以上「錢家有道」網站報名，小琴就希望到時「錢家」一家都喺度醒吓神啦！

[小琴密語]