相片「舊物重用」 陳玉娥選立會知慳識儉

【明報專訊】今屆立法會選舉嘅參選人不論男女，一般都會花費幾千到幾萬元不等，拍攝選舉宣傳硬照、短片等提高曝光率。但Emily睇過落選新界東、被稱為「超級梁粉」嘅陳玉娥（娥姐）申報嘅選舉開支，發現佢成個選舉工程只係用咗3.3萬元，仲喺「個人開支」一欄填上「舊物重用（相片）」字眼，價值不過30大元，真係知慳識儉。


睇番今次選舉開支，舉例如新民黨葉劉淑儀、人民力量陳志全，都分別用咗約1.1萬元搞拍攝、化妝同形象設計等工程。反觀以486票落選嘅娥姐就相當節儉，成個選舉用咗3.3萬元，較貴嘅係聘請咗一名叫「楊君豪」嘅選舉顧問，使咗3000元，同埋收到3張食環署檢控單，要畀700幾蚊移除宣傳品，而佢都收到2.1萬選舉捐款。


陳雲花100萬 與捐款相若

另一方面，同樣落選新界東嘅陳云根（陳雲）就用咗100萬元，但同時收到相等捐款埋單，1000元以下嘅小額捐款都合共有23萬，而大額捐款主要來自熱血公民、普羅政治學苑等政黨，而佢用喺「個人拍攝及個人形象設計」嘅費用，都使咗2.6萬元。