立會順利通過動議 議員「讚歎」

【明報專訊】立法會過去一個月每次會議都出現唔同情况嘅混亂，唔係建制派發動流會，就係非建制陣營令會議亂到無法控制，主席宣布休會，即使上星期會議能舉行，亦多次發生互相投訴，要翻睇會議情况及轉場開會等；經過一個月，噚日會議終可順順利利，估唔到仲可以通過咗兩項議員動議。


立法會大會噚日無風無浪，全日只點過兩次人數，民建聯劉國勳感嘆，議會終於重回正軌，證明法院判決係啱嘅。更有建制派私下笑言，無咗青政梁頌恆、游蕙禎兩人，泛民都唔使日日咁頭痛開會，討論要唔要護送對方等等。


民主黨林卓廷就話，泛民都要尊重法院判決，做唔到咩，又笑言可能係物極必反，所以噚日開會特別平靜。至於以後係咪可以恢復正常審議？佢就話，希望啦。