譚文豪錯讀馬首是「膽」 劉國勳：學好中史助修辭

【明報專訊】立法會大會噚日辯論將初中中國歷史獨立成科，並列為必修科，不同政黨議員都認同學好歷史嘅重要。新民黨主席葉劉淑儀大嘆自己素來極力提倡重視中史教育，推動初、高中獨立成科，可惜多年來係「孤獨推銷員」。其間有小插曲，飛機師譚文豪將四字成語「馬首是瞻」讀成「馬首是『膽』」，鬧出笑料。


葉太：有學生錯寫蘇軾為「蘇車式」

葉太話，唔好睇自己係「番書女」，佢四書五經都讀過吓，可以拋吓書包。佢認為新課程應加入研習中國經典文學著作，指教育局2007年廢除考範文，令學生中文水平大跌，例如有學生用「鶴髮童顏」形容小朋友，將蘇軾寫成「蘇車式」，仲有人將周星馳經典對白「如果做人無夢想，同鹹魚有咩分別」寫入文章當修辭。


不過，立法會議員嘅中文水平都未必一定過關，公民黨譚文豪噚日就肥佬咗，喺發言批評吳克儉時就一字之差鬧出笑話。佢話由吳克儉局長為首嘅教育局、以梁振英特首為首「馬首是『膽』」嘅教育施政，係非常之無信心。


飛機師似乎無意識到自己講錯成語，繼續讀稿。民建聯劉國勳隨後發言，立即糾正，解釋馬首是瞻呢個成語典故來自古代打仗，笑言學好中史對修辭有幫助，抽水抽到應一應。


飛機師事後承認當時睇錯字，又話未習慣讀稿，仲喺「摸索期」。佢夜晚仲拍咗段片自嘲，公民黨議員助理整咗認字表幫佢驗眼，認清「膽、瞻、擔、贍」等嘅分別。飛機師喺fb話唔好意思，「以後一定臥薪嘗膽，熟讀成語」。條片又教番大家「馬首是瞻」出自《左傳．襄公十四年》，係形容「看着主將馬頭方向，決定自己的進退。比喻唯命是從」。