游蕙禎選立會花33.3萬 葉太10萬請公關練辯論

【明報專訊】立法會選舉參選人嘅選舉開支陸續出爐，噚日被法庭裁定取消議員資格嘅青年新政游蕙禎，成個選舉工程只用咗33.3萬元，主要用嚟印刷廣告、製作宣傳片、購置器材等；港島「票后」、新民黨主席葉劉淑儀就用咗170萬元，不但花費近23萬喺facebook同Google賣廣告，做咗多年議員兼前保安局長嘅葉太，仲用咗10萬聘請公關公司做辯論訓練。


周浩鼎名單花497萬

Emily噚日睇過幾名立法會新丁嘅選舉開支，發現佢哋「每票消費」都比部分老鬼低（見表）；好似游蕙禎，以佢喺選舉拎到2萬票計，即平均開支16.1元一票，主要都係做選舉宣傳，如用4.8萬拍咗兩條宣傳片、用近3萬蚊買咗30幾個大聲公。至於參選「超級區議員」嘅民建聯周浩鼎，總共使咗497.3萬元，平均每票要18.8蚊，全部由民建聯埋單。


落選王國興花500萬

葉劉淑儀則用咗170萬元，以佢拎到6萬幾票嚟計，平均每票開支就要近28蚊。


除咗一班當選議員，失落超區議席嘅工聯會王國興都使咗成500萬，主要用喺車身廣告等宣傳費；參選新界東嘅李偲嫣用咗70幾萬元，但就同時揭出佢喺選舉期間，不單過期未交電費，仲收到食環署27張檢控單，合共要繳付1.3萬元嘅移除宣傳品費用。