梁游敗訴 陸頌雄唱《喜氣洋洋》

【明報專訊】特首梁振英同律政司長袁國強向高等法院提出司法覆核同原訴傳票，高院法官噚日頒下判辭，裁定政府勝訴，並頒布禁制令制止青年新政梁頌恆、游蕙禎兩人以議員身分行事。工聯會議員陸頌雄好快就喺facebook上載片段，大唱小鳳姐嘅《喜氣洋洋》。


陸頌雄片段中話歡迎法庭裁決，又落咗多個hashtag，包括「開心到唱歌」、「有請小鳳姐」、「梁已完」及「游已完」等。背景播住《喜氣洋洋》嘅音樂，陸頌雄和唱咗幾句之後，就形容裁決「今次可以話係我哋反對港獨嘅一次重大勝利，所以好多網民及朋友即時好想唱呢首歌」。


佢繼續話，今次梁游「唔作死就唔會死」，兩人宣誓時公然辱華同宣揚港獨，被取消議員資格係咎由自取，大快人心。陸頌雄最後仲話反對港獨係漫長嘅戰爭，往後要加強《基本法》嘅宣傳。