曾鈺成倡香港搵「姊妹城市」 智庫發表報告 畀政府參考

【明報專訊】立法會最近因為宣誓風波而風頭火勢，另一邊廂立法會前主席曾鈺成就搞咗個「香港願景計劃」智庫，作為召集人嘅佢有好多宏圖大計，噚日就公布新一份研究報告，建議香港可同外地建立「姊妹城市」，及增加經貿辦事處。「香港願景計劃」希望報告可以拋磚引玉，畀現屆政府同參選特首嘅候選人參考。


發展創科可拍慕尼黑大田

曾鈺成同Emily講，「姊妹城市」呢樣嘢源於第二次世界大戰後嘅歐洲，指唔同國家嘅城市喺文化、教育、商貿以至技術範疇上可以長期交流。咁點解香港咁耐以嚟都冇設立「姊妹城市」嘅？曾鈺成估計可能香港回歸近20年嚟，政府有其他建設功夫想做喎。


報告建議香港同印尼泗水、阿聯酋迪拜合作發展經貿活動，同德國慕尼黑、韓國大田發展創科產業，以及同韓國釜山、德國柏林發展文化創意產業；大家留意番，大田係韓國嘅創科中心，佔全國科研投資額15%，而泗水嘅經濟增長亦好快。「香港願景計劃」話，建議嘅「姊妹城市」喺歷史文化、經濟結構、社會模式等都同香港相似，希望新一屆政府可以先加入「國際姊妹城市組織」，攞啲專業諮詢作為第一步。


報告又建議政府喺「一帶一路」沿線重點城市增設兩地嘅經貿辦，好似印度、俄羅斯同哈薩克等國嘅城市，曾鈺成話政府透過呢啲政策，可以增強本港作為國際城市嘅地位，亦可以有效咁維護一國兩制。