有話說﹕防自殺報告 誰會收貨？

【明報專訊】過去幾年，接二連三有學生輕生，教育局今年三月宣布成立「防止學生自殺委員會」，等足半年，上星期報告終於出爐，結論係——「學生自殺與教育制度無關」。對於呢份報告，各界有唔同反應，但Mama相信，最滿意嘅，一定係擔心咗大半年嘅教育局長吳克儉，佢終於有覺好瞓喇！


公道自在人心，呢份報告說唔說服到閣下，看官自行判斷。不過，Mama始終睇唔明，一方面話「學童自殺與教育制度並沒有直接關係」，但另一方面，委員會就「建議檢視制度相關部分，如功課壓力、課程設計等」。


恕Mama才疏學淺，轉數低，每每要用比喻先理解到，其實可唔可以咁諗﹕「我個仔喊，同我體罰佢無直接關係」，之不過，專家就「建議我檢視教仔方法相關部分，如精神虐待、粗口謾罵等」？

Mama尚未參透，但有家長群組就擺明對呢份報告唔收貨，仲喺網上發起聯署，促請教育局正視教育制度問題，並提出六大建議﹕

1. 提升中學師生比例，實行小班教學，令學校可以好好支援學生。


2. 建議減少高中核心課程，由現時中、英、數、通識四科，減為只有中、英兩科。


3. 不能單靠指引，必須嚴格禁止學校補課。


4. 廢除小三、小六TSA。


5. 恢復開辦半日制小學，讓家長有權選擇。


6. 要求全日制小學，下午必須有至少一小時的導修課，讓學生可以在校盡量完成功課。其餘家課只限備課、閱讀及蒐集資料等。


嘩！呢六大建議簡直「辣」過政府新推出嘅樓市「辣招」。事關香港教育嘅本土特色，正正就係做唔到以上所講嘅嘢，而且行之已久，呢個家長群組要求教育局作出咁大改革，係咪玩嘢，想「教獨」先？但諗諗下，Mama又唔使咁擔心，皆因香港教育局勝在有不世奇才吳克儉局長掌舵，立法會教育事務委員會又有雖冇教育界背景、但樂於教訓人嘅蔣麗芸議員把關，兩位雙劍合璧，一定有辦法「搞掂」本港教育嘅，大家拭目以待啦！