讚地區領袖 CY落北區匯報房屋

【明報專訊】特首跑馬仔仍未進入白熱化階段，而被視為有意競逐特首寶座嘅特首梁振英（CY）及財政司長曾俊華，近日就頻頻出席活動曝光。CY噚日就去咗北區同超過50個北區地區領袖交流，並向地區領袖匯報解決房屋問題嘅重要，包括增加供應同遏抑非港人自住需求措施、再工業化同新農業政策嘅新近發展。


唔少地區領袖都有一定政治能量，CY就大讚佢哋掌握民情民意，對各種地區問題有認識有建議，值得政府重視。CY今次落區上載咗唔少短片同相上facebook，5年前競選物品「一支筆、一本簿」亦繼續出動。CY除咗向地區領袖匯報同聽意見，亦表現親民一面，又單手抱起小朋友合照，笑容滿面。不過，近日CY去呢類活動都無通知傳媒，唔知係擔心引起混亂定係有其他原因呢？


至於財爺方面，繼星期六同明星薛家燕跳完十字步後，噚日佢出席世界心臟日，就同在場人士一齊跳護心操，事後同樣將活動相放上fb，離開時被記者問到幾時宣布參選特首，財爺就無回應。