星展鍾少權 變身青蜂俠

【明報專訊】將近年尾，各大機構都開始着手籌劃annual dinner（周年晚宴），而呢類晚宴少不免有職員表演。若要喺芸芸參加者中突出自己，最好就有個令人印象難忘嘅造型。星展客戶、存款及抵押貸款高級副總裁鍾少權，喺上周五嘅周年晚宴，就以青蜂俠造型出場，聽講現場仲有女粉絲尖叫呢！

星展上周五喺亞洲博覽館舉行周年晚宴，第一次全星展香港嘅員工一齊參加，而且當晚仲有主題，參加者指定要著紅、黑嘅打扮，配合番星展一向用開嘅主題顏色。雖然鍾少權青蜂俠造型迷倒現場觀眾，但就唔夠傳訊部嘅同事咁嬌俏，佢哋以星展利市封自製成裙仔，星展利市封一向夠可愛，成班公關姐姐着上身，當然冧到班評判將個團體獎頒畀佢哋啦！

雖然鍾少權一身型仔打扮無獎攞，不過佢工作上咁能幹，肯定得到上司誇獎！7月佢先用咗幾架旅遊巴接載香港客返內地，參觀吓星展內地分行之餘，客戶仲喺星展中國踴躍開人民幣戶口，鍾少權話呢個行程認真係「超額完成」，嚟緊仲睇緊有咩機會再帶客上去。

星展仲搞咗個宣傳，只要係豐盛理財客戶，由家至12月維持戶口資產值100萬元以上，就可以自動參加雙人遨遊亞洲之旅大抽獎，有機會贏取旅遊套票總值近10萬蚊，玩足新加坡、上海、台灣、印尼及印度等亞洲旅遊熱點。