競選時承諾捐半份糧幫長者 小麗被追數 義工隊準備中

【明報專訊】獨立議員劉小麗競選時曾承諾，會捐一半議員薪金成立義工隊服務長者，上任個多月嚟只聞樓梯響，加上立法會已經出咗糧，網上近日就出現唔少「追數」帖文，希望佢交代幾時兌現承諾。劉小麗噚日向Emily透露，其實籌備工作已經做緊，正同地區人士商討合作，成事之後會公布，但未有講更多細節。


疑睇錯文件 畀黎棟國反駁

劉小麗前日喺大會投票「甩轆」，噚日亦有蝦碌場面。話說保安事務委員會噚日討論免遣返酷刑聲請，劉小麗話關注到政府文件提及研究建立禁閉營，質疑係咪違反人權。保安局長黎棟國隨即反駁，話睇唔到文件「有你提到嗰句」，話劉小麗可能有誤會，設立禁閉營只係有議員曾經提出嘅建議。


見到劉小麗兩日都出錯，工聯會麥美娟就形容有議員「笑聲救地球，噚日（前日）投錯票，今日（噚日）睇錯文件」。