泰國喪悼衫大賣 佐丹奴亞太銷售佳

【明報專訊】佐丹奴（0709）截至9月底止第3季，綜合銷售額按年跌3%至11.97億元。大中華區表現麻麻，不過亞太其他地區嘅銷售額就錄得7%增長，升幅竟然係因為泰國有強勁增長，期內泰國同店銷售仲有同店毛利都有明顯升幅，分別升16%同17%，但早排泰王駕崩，國民仲邊有心情shopping呀？


管理層透露，泰國國民為表達對泰國王室嘅悲痛同尊敬，對喪悼顏色產品嘅需求增加，公司喺期內進行嘅市場推廣活動好有效，成功帶動polo衫類銷量，令泰國整體銷售額增加。睇返報告，唔計柬埔寨因為得一間舖頭兼基數低影響，泰國第3季銷售額增幅明顯跑贏其他新興市場，按年升24%。不過，泰王始終過咗身，公司搞有關市場推廣真係要好小心，一陣有咩閃失，畀人話發死人財，真係做多多promote都救唔番。


[小琴密語]