押中特朗普 林健鋒贏餐飯

【明報專訊】充滿懸念嘅美國大選噚日吸引全球眼光，其中當然包括香港政圈，噚日立法會開大會，議員們都熱烈討論各大媒體公布嘅滾動結果。有人更因此開賭，經民聯林健鋒就一早買定共和黨特朗普贏，黨友石禮謙就睇好民主黨希拉里，賭注係一餐飯，最後由特朗普跑出。押中注嘅林健鋒再引用佢早前喺英國脫歐時用過嘅金句，就係「民調不可盡信」。


石禮謙講得更白，直言美國人自己攞嚟。至於特朗普上場會對全球有咩影響，石禮謙話「When America sneezes, the world catches a cold（美國打個噴嚏，全世界都傷風）」，相信日後有排搞。支持希拉里嘅經民聯梁美芬都感到好失望，話無辦法見到美國第一個女總統誕生。