美酒展開鑼 芬蘭咖啡伏特加登場

【明報專訊】一連3日嘅香港國際美酒展今日喺灣仔會展開鑼。一如往年，展覽主要畀買家入場買酒，公眾就要到星期六先可以一睹各地美酒嘅真面目。


今年美酒展有37個國家同地區合共超過1060個參展商參加，其中芬蘭、克羅地亞等國係第一次有酒商參展。來自芬蘭嘅酒商「Shaman Spirits」就帶咗芬蘭著名嘅伏特加咖啡酒參展。負責人David話，伏特加係芬蘭主酒，而年半前，當地酒商自創將咖啡或者檸檬、菠蘿果汁等加入酒中，加入新玩意嘅伏特加酒喺歐洲大賣，David話單係芬蘭每年就賣超過100萬支。


David話，今次選擇嚟香港參展，因為美酒展有國際聯繫，藉此將酒推廣到亞洲。除咗芬蘭伏特加，克羅地亞冰酒、斯洛文尼亞葡萄酒等亦將會首次喺酒展亮相。


入場人數方面，貿發局話持樂觀態度，認為酒展嘅酒價有平有貴，公眾開放日（12日，周六）部分酒有七折，相信公眾入場人數可直逼去年嘅3萬人。公眾日開放時間由朝早10點半到下午6點，18歲或以上巿民可憑票入場，每張票售價200元，會送一個酒杯。