手語翻譯新聞未見影 蘇錦樑﹕無綫驚唔準 局方正研究

【明報專訊】聾人希望電視節目增設手語翻譯多年，通訊事務管理局早喺2014年嘅免費電視牌照續期時，喺無綫電視嘅牌照加入相關賦權條文，要求喺電視新聞增設手語翻譯，但一直未生效。噚日立法會大會，街工梁耀忠就提出口頭質詢，要求政府交代進展。


由於梁耀忠噚日唔喺香港，由張超雄代佢讀口頭質詢。商務及經濟發展局長蘇錦樑回覆話，因為無綫電視話坊間手語翻譯人數不足，而且本港手語語言不一致，擔心到時出現新聞內容唔準確，違反通訊局嘅《電視節目守則》，而通訊局都認同應該「審慎起見」，所以局方設立專責小組研究提供手語嘅服務，研究料喺出年11月前完成，到時再睇吓條文應唔應該生效。


張超雄﹕立會早有手語 唔驚唔準？

張超雄反問話立法會3年前已有手語翻譯：「立法機構就唔驚唔準確？」，要求研究完成前，公共廣播機構報道選舉、惡劣天氣等重要資訊時有手語翻譯。蘇錦樑就話無綫應承咗，如果個活動本身有手語提供就會轉播。民主黨尹兆堅就質疑局方家嘅做法係對無綫「放軟手腳、鬆章」，但蘇錦樑都係重複答過嘅內容回應佢。