設橫洲委會被否決 朱凱廸言論惹內訌猜疑

【明報專訊】立法會發展事務委員會噚日以3票之差否決成立委員會跟進橫洲事件，另7名建制派議員就棄權。對於出席會議嘅大部分都係建制派議員，朱凱廸噚晚喺fb將矛頭指向建制派之餘，仲話因為非建制派議員出席不足，先會搞到成立唔到委員會，引嚟網民質疑非建制派內訌。


批非建制出席不足 林卓廷指缺溝通

無出席會議嘅民主黨林卓廷噚晚就隔空喺fb回應阿廸，話自己噚日朝早要去高院出席聆訊，先無參與投票。阿廷同Emily講，佢覺得朱凱廸事前無做足溝通，希望朱嘅矛頭唔好指向同路人，以免令市民產生不必要誤解。有網民留言話唔想見到非建制派內訌，仲話應該要團結對抗建制派。


由姚松炎提出嘅議案，喺建制派反對下，最終以14票贊成、17票反對、7票棄權遭否決。朱凱廸喺fb話，橫洲委員會本應有機會成立，無奈喺非建制派出席不足、建制派集體反對及棄權下遭否決，覺得遺憾。但阿廷就話，即使非建制議員多咗人出席，原本投棄權票嘅建制派見勢色唔對，自然會投反對票，結果一樣會被否決。