純官兩度增持匯控 袋1300萬

【明報專訊】過身冇耐嘅彤叔，生前一直係匯控（0005）fans，原來阿仔鄭家純（純官）對匯控一樣情有獨鍾，而且投資都有啲心得。佢今年4月同7月先後入咗兩次貨，金額雖然唔係多，不過到家帳面已經賺咗1300萬，真係恨死小琴！


入貨至今股價升28%

睇返中央結算系統資料，周大福珠寶金行喺4月增加92萬股匯控持倉，當日收市每股45.95蚊；7月再增加12萬股持倉，同日收市價就係50.35蚊，家總有284.94萬股持倉。兩次入貨，加加埋埋都只不過係用咗4800萬左右，對純官嚟講真係濕濕碎。


自從匯控喺今年8月初宣布，破天荒斥近200億回購股份之後，股價升咗唔少，如果計返純官4月入貨到家，匯控唔覺唔覺已經升咗28%。以噚日59.15蚊收市價計，純官帳面已經贏咗約1300萬。所以話，投資真係要快、狠、準，唔好好似小琴咁，成日齋睇唔知幾時入貨。


[小琴密語]