有話說﹕書包重量 不應超過體重10%

【明報專訊】早兩日，阿囝同我講，學校有個低年級同學，放學時孭住個大書包，唔知係咪書包重、失重心，突然連人帶書包滾落樓梯；好彩當時佢只差幾級就到地面，所以冇乜大礙，只係擦傷些少，但Mama已經聽到心都寒！

講開書包重，Mama剛喺網上一個家長群組亦睇到呢個話題。有個媽媽慨嘆，囡囡體重唔夠50磅，但就要日日孭住一個接近10磅重嘅書包返學，仲未計水壺，以及手挽美勞袋、圖書袋嘅重量。情况就好似一個120磅嘅成年女性，日日拎住一個24磅嘅手袋或者抬一包10公斤米返工咁，慘絕人寰。


我認同呢班家長並非無的放矢，學童書包過重，確實係一個好普遍但又長年解決唔到嘅問題。根據衛生署建議，學童不應長時間背負重量超過自己體重10%嘅書包，好明顯，呢個家長嘅囡囡，書包超重接近一倍，遠超小妹妹嘅負荷量。


Mama請教過註冊物理治療師何淑玲（Horlick），佢話書包重可以好大件事。以雙肩帶式書包為例，如果長期過重，小朋友頭部不期然前傾，令頸椎第6至7節容易受壓；亦因為上背唔夠力，會出現寒背及盆骨向前傾嘅情况；仲有由於學童嘅脊椎仍在發展中，長期受壓，有可能導致脊椎側彎；另外，上斜方肌每日孭咁重嘅嘢，小朋友會感到肩膊痠痛。


家長群組傾得熱烘烘，仲話要發動一人一相，呼籲大家替小朋友嘅書包上磅後影相，然後電郵畀教育局及學校，要求校方推出書包減磅措施。Mama翻查過資料，其實教育局課程發展處喺2014年發出過相關指引，包括要求學校調整時間表，讓學生唔需要喺同一天攜帶大量學習用品回校；建議教師下課前講明下堂用邊本書，用唔着嘅作業、練習簿就唔使帶；建議校方減少使用作業，改用單張嘅工作紙；盡量為學生提供儲物設施等等。


雙肩帶護脊書包最好

不過，Mama作為家長，好明白教育局嘅「建議」有幾大作用，所以，早已習慣「自己孩子自己救」，於是就順便問埋Horlick應該點樣揀書包。佢話，最好當然係用雙肩帶式嘅護脊書包，好處係呢類書包有一塊按照脊骨弧度嘅重心背板，以槓杆原理卸力，但就要用得其所，先可以發揮到作用，「最基本係將最重嘅書本擺放在書包內最貼近背部嘅位置；其次，肩帶一定要收緊，令書包盡量貼近背脊；仲要用埋胸前扣、腰帶扣，咁先可以分散肩膀、脊椎嘅壓力」。


至於拖拉式書包，Horlick話都值得考慮，因為呢種書包靠地面卸力，所以小朋友實際上只係拉緊書包十分之一嘅重量，好輕鬆。但要留意，細路返到學校，有冇需要「抽」起書包行好多級樓梯，如果要，咁佢就唔建議使用喇。