收到假1元 金金大師報警

【明報專訊】除咗假鈔，近日仲有疑似偽造嘅1元硬幣流出市面。綽號「金金大師」嘅北區水貨客關注組召集人梁金成，噚日喺facebook話，買早餐時畀職員懷疑手上嘅1元硬幣係偽造而拒收，硬幣唔止重量輕，圖案亦明顯較粗糙。


梁金成同Emily講，懷疑前日買嘢收到呢個硬幣，可能當時找續咗大量硬幣，無為意真假，好彩買早餐時職員都信佢係無心，於是佢晏晝就去報案。


Emily拎咗一個正常硬幣對比過，發現懷疑偽造嘅1蚊硬幣破綻百出，除咗比正常硬幣輕，上面嘅洋紫荊圖案明顯脹起咗，「2013」、「壹圓」等字都刻劃得無咁細緻清晰。仔細再睇，連硬幣嘅側面都異常圓滑，無咗正常1蚊硬幣應有嘅直條坑紋。


警方發言人回覆Emily，證實馬鞍山分區警署噚日下午收到有人報案，指購物時收到一枚懷疑偽製硬幣，警方已經檢走硬幣作進一步檢驗。大家不妨留意吓手上嘅硬幣係真定假喇！