又熱又涼 下周溫差10℃有多

【明報專訊】話晒已經11月，香港天氣仲係時冷時熱。Emily睇過原來下星期一就立冬，但天文台預測嗰日氣溫有成29℃，但係香港將會受冷鋒影響，下星期四最低會跌到18℃，一個星期內嘅溫差10℃有多。


根據天文台嘅天氣預測，未來幾日嘅氣溫會逐步回升，影響廣東嘅東北季候風喺未來兩三日逐漸被一股偏東氣流取代，去到星期一立冬當日最高氣溫有成29℃。立冬係二十四節氣之一，喺古代係代表冬季嘅開始。


天文台話，有一道冷鋒會喺下周中期為華南沿岸帶嚟顯著較涼嘅天氣，星期四氣溫跌到最低18℃，之後又會慢慢回升！面對好似過山車咁飄忽嘅天氣，市民出門口前記得留意天氣報告喇。