攞盡營運資金上限 梁游立會預支百幾萬 袋袋平安？

【明報專訊】新一屆立法會議員喺亂局之中開始埋位工作，陸陸續續向立法會秘書處申領營運資金。Emily噚日發現青年新政梁頌恆、游蕙禎，早喺9月15日遞表申領分別約83.4萬嘅營運資金，秘書處仲喺9月底蓋上「Paid（已支付）」嘅印章。不過，兩人嘅宣誓風波搞到要人大釋法，隨時被褫奪議員資格，到時佢兩個要唔要即時還番百幾萬呢？秘書處話要進一步研究。


根據秘書處指引，議員可以申請預支「辦事處營運開支、酬酢及交通開支」、同埋「開設辦事處及資訊科技開支」；按照議員申領表格附註可見，兩者申領嘅最高款額分別約為45.9萬同37.5萬，即係合共83.4萬。表格訂明，所批出嘅金額會喺議員卸任前一個月嘅工作開支裏面扣番。


羅冠聰張國鈞同樣申上限

Emily發現除咗梁頌恆同游蕙禎，幾個新丁議員包括香港眾志羅冠聰、民建聯張國鈞等，申請嘅開支同樣去到上限，而民主黨鄺俊宇、新民黨容海恩條數就細啲，分別申請咗50.9萬同50萬，全部都已經批出。