設黨魁負責立會事務 民主黨通過「黨政分工」

【明報專訊】特別大會105票贊成47票反對

民主黨噚晚舉行特別會員大會，以105票贊成、47票反對同2票棄權，大比數通過醞釀已久嘅黨政分工方向，即係分開立法會工作同黨務，但未有落實具體技術細節。民主黨下個月4號會改選主席在內嘅領導層，黨政分工細節將由新一屆中委再商討，繼而推動修章。雖然新一屆領導層未會實現黨政分工，但黨內大致傾向，都係唔鼓勵由立法會議員擔任新主席。


黨政分工下，民主黨會增設黨魁位置，負責立法會政策事務，主席就主力發展招收會員同籌款等黨務。據聞噚晚大會有探討主席定黨魁權力較大，亦有傾到黨魁應該只由立法會黨團選出定係其他黨員都可以參與，而現時大致傾向係主席有較大權、黨魁由黨團選出。現任主席劉慧卿（卿姐）噚日都有出席，但有民主黨中人相信，卿姐競逐連任主席機會唔大。


羅健熙考慮選下屆主席

被視為下任主席熱門人選嘅副主席羅健熙，噚日身在外地無出席大會，佢同Emily講，話考慮緊參選主席，短時間內有決定。


民主黨兩年選一次主席，但新主席將來如果連任，喺黨政分工原則下就參選唔到2020年立法會選舉。羅健熙話，做唔做多過一屆主席，或者選唔選立法會，都係自己考慮緊嘅事。