劉小麗被掟鞋 保港運動：施襲者非成員

【明報專訊】港台節目《城市論壇》噚日喺維園舉行期間發生小插曲，話說喺節目廣告時段，論壇嘉賓、立法會議員劉小麗突然被台下一個頭戴「保衛香港運動」藍色帽嘅男觀眾掟鞋，劉小麗左手同心口被擊中。同場出席論壇嘅組織發起人傅振中，節目後迅速「割蓆」，否認男觀眾係組織成員，聲稱對方係上星期「新相識嘅朋友」， 組織「唔知、無計劃」掟鞋咁話。


左手心口中招 小麗譴責

男觀眾掟鞋後，隨即被現場職員拉離現場，職員應劉小麗要求報警，警員到場了解情况，但男觀眾當時已經離開。劉小麗節目後譴責掟鞋行為，形容對方掟鞋用力唔細，自己唔係好傷但都感到痛楚，批評「有啲口口聲聲話反暴力嘅組織，其實正正係暴力嘅始作俑者」。劉小麗其後登上救護車送院驗傷。


傅振中就強調，呢個男觀眾未有填寫入會表格，又話自己睇唔到隻鞋接觸到劉小麗。咁點解男觀眾會戴住「保衛香港運動」嘅帽呢？佢就話「好多朋友支持政府我都畀（帽）」。


警方話，噚日下晝接到維園有涉襲擊報案，傷者清醒送往律敦治醫院。