黎明聲演教局廣告 為學生抗逆打氣

【明報專訊】曾爆出「我朝早唔會空肚食早餐」等金句嘅天王黎明（Leon），因為公關手腕高明而好多人like，連教育局都搵咗佢嚟宣傳正向思維，局方今個星期五（28日）會推出一個新電視廣告，講學生遇到「打波先嚟落雨」、「考試先嚟失手 」、「空肚先嚟無早餐食」等激氣情况，再由「明蝠俠」旁白，鼓勵學生唔好氣餒。


「聽日實食到早餐嘅」

廣告列出一堆失意事後，由黎明旁白勉勵學生﹕「激氣過後，諗番轉頭，頭先只係芝麻綠豆嘅小事，面對難題不氣餒，他朝成就必定非凡！」之後廣告畫面列出「拉闊角度，放開心情」呢個主旨，再由另一個人旁白話﹕「聽日實食到早餐嘅！」

教育局長吳克儉噚日出席活動後特登介紹呢段廣告，話係教育局因應學童自殺問題推動積極人生思維同態度嘅項目之一，希望學生遇到逆境時唔好氣餒。