宏利新總部 茶水間有無敵海景

【明報專訊】宏利保險（0945）總部由北角搬去觀塘工廠區，好多人都以為降呢，兼且冇咁方便。但小琴噚日參觀過宏利新辦公室，淨係個無敵海景休息室，已經令小琴好羨慕。

宏利新寫字樓喺觀塘碼頭附近，喺東區走廊望番過觀塘，會望到一個拱門形嘅宏利金融中心。宏利租咗12層，所以獲得命名權。成幢大廈對住海景，波士房首先受惠，員工都可以望住海景食飯。因為「拱門」果幾層（即係連接住兩幢），宏利佔用兩層，仲將橫廊用作茶水間兼休息室。落地玻璃，無敵海景，員工喺度食飯都醒神啲。

800名宏利員工喺新寫字樓返工，包括香港區行政總監何達德。而保險代理要四圍傾生意，較少逗留喺呢度。但公司都預留咗地方畀佢哋培訓，所以一樣有機會睇到無敵海景。附近大部分都係工廠大廈，宏利金融中心同鄰近廠廈好似兩個世界，物業由恒基負責興建，成幢中環寫字樓咁。為咗打造甲級商字樓標準，聽其他租戶講，管理公司都有「甲級」要求，其中一項係唔准送外賣上樓，租戶叫咗外賣，要落地下大堂交收。