周澄宣布訂婚 準新郎曾帶避彈衣赴泰被起訴

【明報專訊】已經淡出政界嘅「社運女神」周澄，曾經有唔少裙下之臣；喺立法會選舉期間，更有周刊報道周澄同立法會議員疑似有婚外情，一度令佢嘅感情生活再次成為焦點。噚日，周澄宣布訂婚喇，仲同準新郎一齊喺facebook放「閃光彈」。


《端傳媒》同事 上月交咗通知書

準新郎哥係關學津，咦，Emily覺得個名好熟，原來佢係上年8月去曼谷採訪爆炸案，因攜帶避彈衣被泰國以「未經許可持有武器」罪名起訴嘅《端傳媒》攝影記者。而周澄亦喺《端》度做國際新聞記者，唔知佢哋係咪共事時互生情愫呢？


關學津今日喺facebook貼咗張「婚姻登記官證明書」嘅相，原來佢哋兩個喺9月14日已經遞交咗擬結婚通知書；而周澄就轉埋status，顯示已經同關學津訂婚。