立會下周開會 鄉議局申請千人集會

【明報專訊】近期鄉事派同新任議員朱凱廸就新界土地發展問題關係有啲緊張，鄉議局亦已事先張揚，想喺10月12日即今屆立法會首次開會時，拉大隊去示威，仲有人聲言屆時會召集到上萬人參加；但原來佢哋只向警方申請1000人集會，人數大縮水。


有人聲言萬人 知情者﹕一直申千人

鄉議局上月開大會，大家都支持去立法會大集會，仲有人講到明要聲討朱凱廸，同時慶賀主席劉業強晉身立法會，當時已有人擔心，一旦有人忍唔住做出激烈行為，會影響鄉事形象。有知情者就話，鄉議局一直都只係向警方申請1000人集會，屆時主要係叫吓口號、講吓鄉民權益，無諗住搞激烈行為。


佢哋亦相信，立法會屆時會安排去示威區集會，除非朱凱廸刻意經呢邊入口去立法會大樓，否則雙方發生衝突機率唔大。


警方就話接獲一個團體通知，擬於12號於立法會外舉行公眾活動，正向團體了解活動細節，並會按現行機制考慮係咪發出不反對通知書。