體雕大狀被中銀追49萬

【明報專訊】有「體雕大狀」之稱嘅大律師梁思豪，日前被中銀信用卡（國際）有限公司入稟區域法院追討48.8萬元「中銀分期易達錢」嘅欠款同利息。梁大狀就同Emily呻，話佢的確係有一兩期還唔到錢，但就無收中銀律師信，仲懷疑係因為佢參加立法會補選、處理保釋金事件等畀人「秋後算帳」。


Emily喺入稟狀見到梁大狀個名，就即刻打去問吓，梁大狀話係行家打畀佢問佢先知道，覺得好驚訝，相信係對方將律師信寄咗去舊地址。梁大狀又話，家佢要一次過籌到筆錢，難度更大，佢都諗緊辦法。


中銀嘅入稟狀話，梁大狀喺2013年12月借咗78.7萬，要喺前年1月開始每月還1.2萬，一共分72期還錢，但梁大狀無準時還錢，所以入稟法院追數。中銀回應話，會聯絡逾期嘅客戶傾吓點找數，如果情况比較嚴重，會考慮透過法律程序追數，但對於個別已進入司法程序嘅個案，中銀就唔評論喇。