莎翁《第一對開本》月底免費展出

【明報專訊】今年係大文豪莎士比亞逝世400周年，英國伊頓公學（Eton College）同倫敦獨立書店海伍德．希爾（Heywood Hill）宣布，10月將會喺香港蘇富比免費展出莎翁劇作集《第一對開本》（The First Folio）珍藏，一眾莎翁迷要留意。


今次作品展會展出莎翁嘅第一對開本、畫作、攝影集錦等，第一對開本收集咗唔少經典劇目，好似《第十二夜》、《暴風雨》等文學瑰寶。全部作品由伊頓公學借出，公學副教務長安德魯．蓋利（Andrew Gailey）話，希望藉住展覽激發大家藝術鑑賞力同審美觀之餘，亦可令香港莎翁迷好好享受一段文學時光。


展覽只得4日，於10月26日（周三）至10月28日（周五）上午10點至下午6點、10月29日（周六）上午11點至下午5點，於金鐘太古廣場5樓「蘇富比藝術空間」展出。