為輪椅者發聲 盧覓雪：畀一吋路壆玩死

【明報專訊】為提倡傷健共融社會，香港傷殘青年協會早前請嚟藝人盧覓雪試坐一日輪椅，代入傷殘人士處境，了解佢哋嘅需要。


盧覓雪噚日同Emily講番當日感受，佢話自己要由橫頭磡邨出發到樂富街市買餸，途中上落好多路壆，但輪椅個轆又卡住喺壆邊，令佢非常頭痕，諗番起都忍唔住話﹕「真係一吋路壆都玩死我！」佢認為如果磨平路壆會更方便傷殘人士。


亂用無障礙斜路「好霸道」

今次體驗仲令盧覓雪明白，平時貪方便亂用無障礙斜路，會令傷殘人士有路無得行，絕對係一種霸道行為。佢話入樂富街市時，由於太多人亂用無障礙斜路，令坐住輪椅嘅佢要等所有人行晒先行得。


香港傷殘青年協會行政總監劉家倫話，無障礙設施好重要，協會不時同房屋署同領展開會，討論點樣改善相關設施，仲預告嚟緊星期六會喺樂富商場A區辦無障礙挑戰賽，參賽者會戴住眼罩或坐輪椅代入殘疾人士角色，再完成一系列挑戰，協會話希望參加者了解香港無障礙設施同時，亦學習多主動幫助有需要嘅人。