民主動力眾籌 送楊雪盈海報

【明報專訊】民主動力喺立法會選舉花咗45萬元委託港大民研做大型民調，等大家投票前可以參考各候選人嘅支持度，到咗埋單找數嘅時候，佢哋就呼籲大家幫手搞眾籌集資，目標係籌25萬元。支持者捐款都有回報嘅，好似首100名捐300元者，可以得到靚女區議員楊雪盈簽名海報乙份，捐8964元更可同著名音樂人周博賢共進晚餐。


民主動力召集人趙家賢話，因為之前搞眾籌出現技術問題，早前籌到嘅8萬元已退回捐贈者，今次重新籌款一次，仲定出不同嘅捐款金額畀支持者選擇。楊雪盈都算唔話得，除咗提供個人海報，捐款800元者更有機會得到佢親手做嘅曲奇餅。Emily相信唔少人會好奇問，大額捐款8964元，除咗可同音樂人周博賢食飯，咁可唔可以選擇同楊雪盈食飯呢？


趙家賢話支持者都可以捐689元，意思係咩就唔使多講喇。想知多啲詳情，可以去民主動力facebook睇吓。