蝸居攝影展 董伯伯主持揭幕 棺材屋展覽教育下一代

【明報專訊】為令市民了解香港住屋問題，香港社區組織協會噚日喺銅鑼灣搞咗個「棺材屋」展覽，喺路中心放咗個雙層衣櫃，上層照擺衫，下層就變成一個有被鋪有糧食有日常用品嘅棺材屋「單位」。社協話咁樣嘅設計安排，就係想話畀市民知，我哋平日用嚟放衫嘅15平方呎衣櫃，正正就係某啲低下階層嘅蝸居。


社協話，呢個15呎展覽棺材屋月租要2000蚊，有行過嘅市民聽到之後都覺得好驚訝。市民梁先生噚日就帶同5歲囝囝一齊睇展覽，佢話自己一家三口住劏房，因為屋企得一個窗、一張碌架牀，所以阿仔鍾意公園多過屋企，梁先生希望囝囝試瞓之後，明白自己屋企唔係最差，學識感恩。


社協今日下午3點起一連7日，喺尖沙嘴文化中心舉辦「侷住」攝影展，用50張蝸居相同大家一齊思考香港房屋未來。社協今次仲請到好關心香港嘅全國政協副主席、前特首董建華親臨主持揭幕，唔知當年後期無咗八萬五政策嘅董伯伯，會唔會體會一下棺材屋環境，又會唔會提出咩建議去改善香港居住問題呢？