一個講太空 一個講希望 CY財爺寫blog談期望

【明報專訊】特首梁振英（CY）及財政司長曾俊華噚日齊齊做鍵盤戰士，大談對香港嘅期望。財爺喺網誌借慈善組織「醫藝盟」幫人為名，話「我們一樣可以為身邊人帶來希望，帶來多一點正能量，香港亦可以變成一個更可愛的地方」。CY晚上喺網誌發功，大談科技，話希望香港有第一個太空人！


曾俊華噚日發表網誌，話上星期出席「醫藝盟」活動時深受感動，話有熱心醫護人員同音樂家關懷弱勢，令受助人感到愛同關懷。佢有感而發，形容當人無咗希望，人生就會「黯然無光」，又話無論係唔係醫生，都可以為身邊人帶來希望，香港亦變得更可愛。


CY噚晚亦發表網誌，話噚日下晝喺禮賓府接待「香港中學生太空搭載實驗方案設計比賽」得獎中學生（圖），聽佢哋介紹得獎作品。CY話，獲比賽三甲嘅中學，佢哋所設計嘅科學實驗，將會隨中國即將發射嘅「神舟十一號」載人飛船升空，並喺「天宮二號」太空實驗室做實驗。CY同同學仔講，話希望香港人將來喺太空都有角色，希望同學仔當中，有人早日成為香港第一位太空人，喺國家太空實驗室或空間站做實驗。