下月底創科嘉年華 中二生發明「樹膠布」助樹木殺菌

【明報專訊】10月14號至12月3號係政府舉辦嘅「創新科技月」，創新科技署噚日簡介當中重頭戲「創新科技嘉年華2016」，嘉年華會係10月29號至11月6號喺香港科學園舉行。


今年嘉年華主題係「智慧生活．創新香港」，屆時有多個團體表演，有多場講座，亦會展出本地多項科研成果同學生嘅得獎發明，Emily噚日率先睇咗部分學生發明，呢班學生年紀輕輕創意多多，例如順德聯誼總會翁祐中學嘅幾名中二女生就發明咗有「樹膠布」之稱嘅「樹木創可貼」，以較環保嘅做法幫助樹木殺菌。


嘉年華亦會舉辦近300場嘅創新及科技工作坊，又有近300場導賞參觀科學園嘅綠色設施，小朋友亦可以體驗VR虛擬實境遊戲，戴咗VR裝備後喺100米高空走獨木橋，營救創新及科技大使麥嘜。為咗方便市民參與嘉年華，創新科技署喺嘉年華期間，喺港鐵大學站同沙田站提供免費穿梭巴士服務，周六、周日更會提供來往會場與港鐵九龍塘站、金鐘站嘅免費穿梭巴士服務。