民記3000蚊俄羅斯團 500人爭30名額

【明報專訊】民建聯獲得民政事務局轄下公民教育委員會資助，舉辦「一帶一路」俄羅斯8日交流團，團費只需3000元，民建聯副秘書長葉傲冬噚日喺商台節目話，該團並無政治宣傳目的，只係希望參加者透過與中國企業及當地港商交流，了解「一帶一路」嘅機遇。據葉傲冬了解，該團30個名額，截至前日已經有500多人報名參加。


葉傲冬話，最終要視乎情况決定面試方式，面試主要會了解參加者對「一帶一路」嘅認識及投入，唔會以過去曾參與民建聯活動者優先，亦唔會考慮政治取態，報名時亦無要求參加者交代政治取向或聯繫。


至於民建聯立法會議員會否帶隊，佢話未決定，但交流團以民建聯名義申請資助，故帶團嘅將係組織主要負責人。