社企教設計長者屋 燈光都有貼士

【明報專訊】大家都知道人老咗就會多病痛，例如行路唔方便、眼仔睇唔到嘢等等，唔少人因為唔識改變屋企嘅配套，要安排家中兩老入住老人院。


有社企就同家俬店合作，喺舖入面騰出位置開咗個「長者家居設計及照料服務體驗館」，教大家點樣設計長者屋之餘，亦畀大家感受長者嘅生活需要，好好為家中長者預備最適合佢哋安享晚年嘅居所。


Emily噚日率先去體驗館睇過，530方呎嘅示範單位，家俬以圓角為主，坐廁隔籬有扶手，浴室又有防滑地磚，屋入面嘅燈仲要以柔和為主，設計師話係為咗令有眼疾嘅老人家睇得舒服啲。


體驗館仲可以畀大家book件長者體驗衣同戴副模仿長者視力嘅眼鏡，去感受吓長者家居需要，有興趣嘅讀者可以上「長屋設計」嘅面書了解更多體驗館詳情。