培訓醫生 奧比斯增「3D手術放映」

【明報專訊】經過5年改裝，奧比斯第三代眼科醫院今年6月面世。同上兩代相比，第三代眼科飛機醫院多咗3D拍攝同傳送技術，奧比斯話接受培訓嘅醫療團隊只要戴副3D眼鏡，就可以清楚睇到手術過程，感覺真實到好似自己做咁話。


奧比斯義務眼科醫生李佑榮同Emily講，做眼科手術最緊要方法準確、手勢啱，有咗3D放映技術，接受培訓嘅醫生就可以睇清楚病人嘅問題，同醫生每個手勢。佢仲話，2014年去濟南義務睇症時，發現唔少病人因為當地醫療技術不足而令病情惡化，佢希望隨住第三代眼科飛機有更好嘅教學設備，培訓更多落後地區嘅眼科醫生。


第三代飛機醫院停港6日

第三代眼科飛機醫院喺2011年開始改裝工程，今年6月由美國啟航，上月飛到去瀋陽做第一站醫治同培訓工作，噚日起一連6日會停喺香港，獲邀嘅公眾就可以上機參觀。Emily噚日去睇過，飛機上除咗有個46個座位嘅教學室，仲有視聽室同觀察室，畀接受培訓者睇手術過程。機嘅中央位就係手術室，手術室外有個有兩張病牀嘅等候區，畀手術前後嘅病人休息。