鄧家彪離立會：I'll be back 帶住工人致謝牌匾返東涌

【明報專訊】現屆立法會議員任期本月底屆滿，由勞工界轉戰新界東直選但落敗嘅工聯會鄧家彪（阿彪），近日執拾議員辦公室，準備「交吉」畀自動當選勞工界嘅黨友陸頌雄。阿彪噚日一邊執房，一邊引用電影《未來戰士》經典對白「I'll be back（我會回來）」，為自己過去4年議會生涯作結，唔通佢暗示4年後選舉會捲土重來？阿彪無正面答Emily，笑住話﹕「唔知呢？」


阿彪嘅議員辦公室掛上一塊「為基層不平鳴」嘅牌匾，佢話對呢塊牌匾好大感觸，原來身兼東涌區議員嘅阿彪，未做立法會議員前，曾經幫當區商場外判工反對減薪，僱主最終雖然無將薪酬回復原先水平，但阿彪都為外判工爭取到細啲嘅減幅。呢班外判工後來夾錢喺勞動節送牌匾畀阿彪多謝佢，阿彪噚日話會將呢塊牌匾帶返東涌。


孖王國興助工聯會「入屋」

阿彪透露，嚟緊會同同樣落選嘅黨友王國興合作，為工聯會搞搞新形象，例如透過多媒體令工聯會形象更「入屋」。佢話工聯會一直關注勞工議題，但形象唔夠深入民心，相信亦係今次落選原因之一，所以未來會加強形象工作咁話。


議會另一把勞工聲音、工黨李卓人今年亦落選，佢日前同議辦員工道別，並上載短片到facebook，但各人並無離愁別緒，反而互相報以笑容。做咗超過20年立法局/會議員嘅阿人攞住行李篋同背囊離開議辦，放低咗議員重擔，相信日後會輕鬆啲。