立會新表決系統 議員座位增板腦

【明報專訊】新一屆立法會會期即將展開，立法會秘書處今年為議員特別整咗一套新嘅電子表決系統，議員以往透過控制面板投票機投票，新安排下控制面板保留傳譯同傳召服務員等功能，但議員座位就新增投票用嘅平板電腦，平板電腦除咗「接收」投票功能，仲可以顯示更多資訊。過往立法會不時出現投錯票，唔知新電子系統幫唔幫到議員減少失誤呢？


平板電腦除咗顯示表決按鈕，亦顯示計時器、輪流發言人數、討論中嘅議案同表決結果等，可謂麻雀雖小、五臟俱全，新一屆議員日後開會，相信毋須經常抬高頭望會議廳屏幕。平板電腦被電線固定喺議員座位，唔可以隨身攜帶，所以議員仍要出席會議坐定定先可以投票。


網站更新 投票紀錄更快睇

議員今年亦可以透過秘書處準備嘅網上系統，報名加入各個委員會，同查看邊個議員已經報名成為委員。此舉會唔會令大群議員喺限期前「突襲」加入委員會呢？秘書處就解釋，過往以傳真處理報名時，已經會喺限期前發送臨時委員會名單畀議員知道。


秘書處同時更新立法會網站，令公眾可以更快查閱議案投票紀錄，毋須等到會議紀錄完成後先見到。