恒大淘寶大花筒 1年使晒8.7億

【明報專訊】恒大（3333）同阿里巴巴合營嘅中超球隊恒大淘寶，今年1月喺新三板上市集資近8.7億（人民幣．下同），成為全亞洲最值錢球隊，另一邊喺中超又贏到開巷，不過唔代表贏大錢，因為唔夠一年，集資返嚟嘅錢只係用剩840.64元。


恒大淘寶今個球季以26場累積57分名列前茅，比排第二嘅蘇寧贏多7分。不過贏咗排名，半年虧損亦多達3.12億人仔，虧損程度為17家新三板體育概念股之冠。上市唔夠一年，到今年6月底，不單止將籌到啲錢使晒，連賺到嘅利息都使埋，前後用咗8.71億人仔，剩番840.64元人仔。


搞球隊從來賺名容易賺錢難，恒大淘寶燒錢之快同歐洲甲組同英超球會不相伯仲，不過股東們唔好以為就咁就完，皆因7至8月許家印繼續豪派贏波獎金，粗略估計至少俾多7000至8000萬，恐怕條數有排計。


email: piano@mingpao.com

[小琴密語]